نوجوان ٻاهر نڪري حڪومت مخالف سازش خلاف احتجاج ڪن.عوام جي ٽيليفون تي سوالن جا جواب ڏيندي وزيراعظم عمران خان نوجوانن کي مخاطب ٿيندي چيو ته چڱائي جي واٽ ۽ برائي خلاف بيهڻ سان ئي سماج زندهه ٿيندو آهي، نوجوانن کي فيصلو ڪرڻو آهي، خاموش رهڻ برائي جو ساٿ ڏيڻ برابر آهي، احتجاج پرتشدد نه پرامن هجڻ گهرجي.وزيراعظم عمران خان چيو ته جيئن تاريخ مغل سلطنت جي غدارن کي نه وساريو آهي، اڄ جي غدارن کي به تاريخ نه وساريندي، حڪومت خلاف سازش ٿي رهي آهي، ان جا دستاويز به قومي سلامتي ڪميٽي ۾ ڏنا ويا آهن.هڪ ڪالر جي سوال جي جواب ۾ عمران خان چيو ته هو سازشن خلاف پهريان کان تياري ڪري پيو، سڀ ڏسندا ته سڀاڻي مخالفن جو ڪيئن مقابلو ڪندو، اهي ماڻهو ڪيس ختم ڪرائڻ لاءِ اقتدار ۾ اچڻ چاهن ٿا.وزيراعظم اعلان ڪيو ته جن ماڻهن ملڪ سان غداري ڪئي آهي ته انهن خلاف ڪيس داخل ڪندا.سوشل ميڊيا تان هڪ سوال جي جواب ۾ عمران خان چيو ته سندن فوج سان ڪو مسئلو ناهي، پاڪ فوج ۽ پاڪستان تحريڪ انصاف ملڪ کي متحد ڪيو آهي، هو فوج جي اڻڌريو رهڻ واري فيصلي جو احترام ڪن ٿا، فوج جي وقار کي برقرار رکڻ لاءِ هو ان سان گڏ آهن، ملڪ کي فوج جي ضرورت آهي، جنهن وڏيون قربانيون ڏنيون آهن، هو چاهي ٿو ته ملڪي فوج تي تنقيد نه ٿئي.وزيراعظم هن مخالف ڌر جي اڳواڻن جي بيان تي تنقيد ڪندي چيو ته ”ڪو چوي ٿو فقير چونڊ نٿا ڪري سگهن، ٻيو چوي ٿو ته لائف سپورٽ مشن تي آهي، مديني جي رياست انصاف، انسانيت ۽ خودمختياري تي ٻڌل هئي، جيڪڏهن ڪو ڊڄي زندگي گذاري پيو ته ان کان بهتر مرڻ آهي.عمران خان چيو ته هي اهي ڏينهن ناهن جڏهن ذوالفقار علي ڀٽو جو عدالت کان مٿانهون قتل ڪيو ويو، هاڻي سوشل ميڊيا جو دور آهي، هو چاهي ٿو ته نوجوان هاڻي ان سازش خلاف احتجاج ڪن، پريشان نه ٿيو، سڀاڻي قومي اسيمبلي ۾ کين شڪست ڏيندو.قيادت جي کوٽ واري سوال جي جواب ۾ هن چيو ته نواز شريف ماڻهن کي پئسن تي لڳائي ڇڏيو، آصف علي زرداري به ساڻن گڏ ٿي ويو، برائي – برائي سان ملي وئي، سنڌ هائوس ۾ ايندڙ پئسو هوٽلن ۾ رکيو پيو وڃي، اهڙن ماڻهن اخلاقيات کي تباهه ڪري ڇڏيو آهي.هن چيو ته جيڪي ماڻهو مخالفن ڏانهن ويا هي ڊڄي ويا آهن، جيڪڏهن هنن ووٽ ڏنو ته غدار بڻجي ويندا، کيس انهن ماڻهن جا پيغام اچڻ شروع ٿي ويا آهن.پرويز الاهي جي پنجاب جو وڏو وزير بڻجڻ بابت سوال جي جواب ۾ وزيراعظم چيو ته پيءُ وزير اعظم ۽ پٽ وزيراعليٰ بڻجڻ جا خواب ڏسي رهيو آهي، هو ٻيهر چوي ٿو ته قوم کي گهٻرائڻ جي ضرورت نه آهي
